அன்பானவர்களே, "என் சமுகம் உனக்கு முன்பாகச் செல்லும், நான் உனக்கு இளைப்பாறுதல் தருவேன்" (யாத்திராகமம் 33:14)என்று இன்றைய வாக்குத்தத்தம் கூறுகிறது. இந்த வசனம் அனுதின நோக்கில் நமக்கு முக்கியமானதாகும். 'எந்தப் பொருள் இல்லாவிட்டால் உங்களால் வாழ முடியாது?' என்று கேட்டு விளையாடும் விளையாட்டு உங்களுக்குத் தெரிந்திருக்கும். அதற்குப் பதிலாக சிலர், செல்போன் என்றும், கைப்பை என்றும், பல் துலக்கும் பிரஷ் என்று கூறுவார்கள். ஆனால் மிக முக்கியமான காரியம், தேவ பிரசன்னமாகும். "தேவ பிரசன்னமே எல்லாவற்றைக் காட்டிலும் முக்கிய தேவை," என்று நாம் கூறவேண்டும். தேவன் நம்மோடிருக்கும்போது, அவர் நமக்கு இளைப்பாறுதல் அளிப்பதாக வாக்குப்பண்ணுகிறார்.

இளைப்பாறுதல் என்றால் என்ன? நம் சரீர பிரகாரமாகவும் மன ரீதியிலும் நாம் சமாதானத்தோடு இருப்பதே இளைப்பாறுதலாகும். அப்போது நம்மால் இன்னும் சிறப்பாக செயல்பட முடியும் என்பதே இதன் அர்த்தமாகும். தேவ ராஜ்யத்திற்கென நாம் அநேக நற்காரியங்களை செய்து, அநேகருக்கு உதவுகிறோம். இந்த இளைப்பாறுதலின் மூலமாக, என்ன தீர்மானங்களை செய்யவேண்டும் என்றும், எது சரி, எது தவறு என்றும் அறிந்துகொள்கிறோம். நாம் மற்றவர்களுக்கு ஆசீர்வாதமாக விளங்குகிறோம்.

"அவன் நீர்க்கால்களின் ஓரமாய் நடப்பட்டு, தன் காலத்தில் தன் கனியைத் தந்து, இலையுதிராதிருக்கிற மரத்தைப்போலிருப்பான்; அவன் செய்வதெல்லாம் வாய்க்கும்" (சங்கீதம் 1:3) என்று வேதத்தில் வாசிக்கிறோம். எங்கள் மருத்துவமனையில் நர்ஸாக பணிபுரியும் ஜேஸ்மினின் வாழ்க்கையில் இதை நான் கண்டிருக்கிறேன். அவர்களுக்கு அநேக பிரச்னைகள் இருந்தாலும், தேவ பிரசன்னம் எப்போதும் அவர்கள்மீது இருக்கும். அவர்கள் அவசர சிகிச்சைப் பிரிவின் பொறுப்பாளராக இருக்கிறார்கள். குழப்பமான நேரங்களில் அவர்களை உதவிக்கு அழைப்போம். அவர்கள் அருகில் இருந்தாலே சமாதானமாக உணர முடியும். நான் அவசர சிகிச்சைப் பிரிவுக்குச் செல்லும்போது, முன்னதாகவே அவர்கள் அங்கே இருப்பதை உறுதி செய்துகொள்வேன். தேவன் அவர்களுக்குள் இருப்பதால் அவர்கள் அநேகருக்கு ஆசீர்வாதமாக விளங்குகிறார்கள். ஆகவே, ஒவ்வொரு நாளையும் ஆரம்பிக்கும் முன்னர், உங்களோடு இருக்கும்படி தேவனிடம் கேளுங்கள். அலுவலக, பணி இடைவேளைகளில் அவரது பிரசன்னம் விளங்கும்படி கேளுங்கள். கைப்பேசியில் மின்னாற்றல் குறையும்போது நாம் மீண்டும் ஆற்றலை ஏற்றுகிறதுபோல, தேவன் உங்களுக்கு மறுபடியுமாய் ஆற்றலை தரட்டும். இன்றைக்கு தேவ பிரசன்னம் நம்மை நிரப்பும்படி ஜெபிப்போம்.

ஜெபம்:

அன்புள்ள தகப்பனே, இன்றைய பொழுதை நான் ஆரம்பிக்கிற வேளையில் உம்முடைய பிரசன்னம் என்னோடு இருப்பதாக. என்னை வழிநடத்தும்; உம்முடைய சமாதானத்தினால் நிரப்பும்; சரியான முடிவுகளை எடுப்பதற்கான ஞானத்தை எனக்கு தாரும். நீர் என்னை பூரணமாய் ஆசீர்வதித்துள்ளதுபோல், மற்றவர்களுக்கு நான் ஆசீர்வாதமாக விளங்குவதற்கு எனக்கு உதவும். நீர் என்மேல் மாறாத அன்பு காட்டி, என்னை தாங்கி வருவதற்காக நன்றி செலுத்தி இயேசுவின் நாமத்தில் ஜெபிக்கிறேன், ஆமென்.